Австриецот Винсент Крихмаер ја запиша третата победа во спуст сезонава во Светскиот куп во алпско скијање. Австриецот денеска победи на домашен терен, во спустов во Кицбил на славната патека „Штрајф“.
Изненадувачки, второто место со заостанување од 23 стотинки му припадна на Италијанецот Флоријан Шидер на кого ова му е првпат да застане на подиумот во СК. Третото место го освои Швајцарецот Нилс Хинтерман.
Утре на „Штрајф“ ќе се одржи уште еден спуст, а потоа на патеката „Ганслерн“ ќе се вози слалом.
Во женска конкуренција домашна победа на Софија Гоџа во спустот во Кортина Д’Ампецо. Второто место и припадна на словенечката скијачка Илка Штухец, а третото на Германката Кира Вајлде. Микаела Шифрин го зазема четвртото место.
