Левски вечерва на Арената Тодор Проески во рамките од второто коло квалификации за Конференциската лига го совлада нашиот претставник Шкупи со 0:2, со што во голема мера си го осигура пласманот понатаму.
Бугарскиот состав дојде во Скопје по поволен резултат и тоа и го оствари. Тренерот на Левски, Николај Костов на пес конференцијата по мечот, рече дека Левски заслужил да победи на терен кој реално не бил за игра.
„На ваков очаен терен ова што го одигравме е одлично. Забележавме голема победа, која не прави фаворит за пласманот понатаму. Реално на ваков терен и не можевме нешто да одиграме освен тие долги топки, и таа тактика која ја практикувавме вечерва. Имаше провокации на теренот, што не би требало да се случува, сепак, ова е спорт. Жал ми е за тоа што се случувало во текот на денешниот ден со нашите навивачи, тоа не смее да се случува исто така“ – рече Костов.
