Македонската женска кадетска ракометна селекција со убедлив пораз тргна на ЕП за ракометарки до 17 години кое се одржува во Црна Гора. Избраничките на селекторот Кристијан Грчевски, попладнево загубија од силната селекција на Романија со 40:27 (23:15), во меч од 1.коло во групата-Д.
Освен на стартот на мечот кога нашите ракометарки достојно резултатски им се спротиставуваа на Романките, беа рамноправни, во текот на преостанатиот дел од средбата се виде дека Романија е одлична селекција. На пауза се замина со 23:15.
Во второто полувреме Романија не ни даде никаква шанса макар да се приближиме резултатски, па така на крајот беше 40:27.
Ива Младеновски постигна 10 голови и беше најефикасна на средбата, додека во нашата селекција за голови расположена беше и Анастасија Трпеска со седум голови.
Утре од 13.30 Македонија се среќава со Унгарија, а во недела од 20:15 часот со Франција во последниот меч од групата – Д на овој европски шампионат за ракометарки до 17 години.
