Шест натпревари се на денешната програма од петото коло во Супер-лигата. Во центарот на вниманието е пресметката меѓу Тиквеш 2014 и ГРК Охрид (19 часот, МРТ) во дербито на колото во Групата А.
Кавадарчани имаат скор од четири победи во исто толку одиграни натпревари, дали ќе останат во друштвото на Алкалоид и Вардар 1961, одговорот ќе го даде ГРК Охрид. На избраниците на Стевче Алушовски им е потребен триумф во еден ваков меч за да се вклучат во битката за второто место.
Први на теренот ќе истрчаат Пелистер 2 и Аеродром (13 часот), во рамките на групата А колото ќе го комплетираат Скопје 2020 и Куманово (15 часот).
Во групата Б, дебитантот Мулти Есенс е домаќин на Прилеп (17 часот), во истиот термин Голден Арт ќе го пречека Пролет кој има ист скор на Пелистер (три победи и пораз). Актуелниот македонски првак на домашен терен го пречекува Бутел Скопје.
