Лос Анџелес Клиперс утринава го победи шампионот Денвер со 111:102 и ја прекина серијата од осум порази во меѓусебните натпревари во НБА лигата.
Клиперси до победата ги предводеше Пол Џорџ со 25 поени, а Џејмс Харден додаде 20 поени и 11 асистенции. Кави Ленард и Норман Пауел одиграа исто така одличен меч со по 17 поени.
Во тимот на актуелниот шампион Џамал Мареј постигна 23 поени, а српскиот центар Никола Јокиќ имаше трипл-дабл учинок од 22 поени, 15 скока и 10 асистенции. Ова е прв пораз на Нагетс од Клиперс од 11 јануари 2022 година.
Далас ја победи Јута со 50 кошеви разлика во една од најубедливите победи на франшизата. Мавси славеа со 147:97 предводени од Лука Дончиќ, кој имаше трипл-дабл учинок од 40 поени, 11 скока и 10 асистенции.
Кошаркарите на Хјустон ја победија Оклахома со 110:101 и ја прекинаа серијата од три порази. Мајами, пак, беше подобар од Торонто со 112:103 и ја постигнаа втората победа во последните шест натпревари. Кејлеб Мартин со 24 поени и 12 скока беше најефикасен кај домашните.
Нов фантастичен меч имаше и Жоел Ембид, кој со Филаделфија го победи Вашингтон со 131:126. Ембид постигна 50 поени со 13 скока и седум асистенции. Ова е шестипат кога Ембиид постигнува најмалку 50 поени на еден натпревар.
