Женската кадетска одбојкарска репрезентација на Македонија го освои петтото место на Балканското првенство во Тирана. Денеска во мечот од разигрувањето, избраничките на селекторот Александар Митев славеа со 3:2 во дуелот со Црна Гора и со втора победа најавија дека полека го креваат нивото на женската одбојка во меѓународни рамки.
МАКЕДОНИЈА – ЦРНА ГОРА 3:2 (23:25, 25:20, 22:25, 25:17, 18:16)
Во првото коло од групната фаза нашата репрезентација славеше против Албанија со 3:1, а денеска одигра маратонски меч со Црна Гора и успеа да запише и втор триумф.
Албанија со победа од 3:1 против Молдавија го освои 7. место, додека селекцијата на Србија е третопласирана, откако со 3:1 во малото финале ја совлада Романија. Финалето меѓу Бугарија и Турција се игра попладнево.