Дербито на 11 коло во Првата лига кое се одигра во многу ран термин му припадна на Пелистер кој славеше против со ТФТ со 91-82. За тимот од Тафталиџе ова е само втор пораз од стартот на сезоната, претходно загуби од Чари. На другата страна битолчани го запишаа осмиот триумф, имаат и три порази.
Во првото полувреме видовме изедначена битка на теренот, водството се менуваше, со тоа што Пелистер на одморот замина со минимална предност од три поени (39-36).
Битолчани одиграа добро во третата четвртина која ја добија со 30-17 и направија разлика. Со серија од 5-0 поведоа со двоцифрени 52-42, а потоа во 27-та минута имаа плус 16 (62-46). Избраниците на Александар Петровиќ не застанаа и на стартот на последните десет минути имаа највисоки 69-53. И се чинеше дека тука е крајот.
ТФТ се обиде да се врати во игра за победа, иако беше тешко, сепак не се откажа. При последната негатив од 18 поени (74-56) гостите од Скопје со серија од 15-2 спуштија на само минус пет (79-74) на три и пол минути до крајот. Агонијата во таборот на Пелистер ја прекина Бојиќ за 81-74. ТФТ продолжи да го притиска домаќинот, драмата стана уште поголема кога Зафиров намали на 83-78 во 38-та минута. ТФТ чекаше кикс на битолчани за да се доближи посериозно, но Бојиќ беше незадржлив под обрачите. Во самиот финиш кошаркарите на Пелистер беа постабилни и на крајот успеаја да ги освојат бодовите.
Бојиќ мечот го заврши со 23 поени, зад него беше Стајиќ со 16 поени и 9 асистенции. На другата страна Хатон имаше 18 поени и 13 скока, додека Стојаноски 16 поени.
