Во вечерното дерби на Евробаскетот, кошаркарската селекција на Грција славеше над Италија со 75:66. Иако пропушти поголем дел од подготовките со грчката репрезентација, Јанис Адетокумбо беше доминантен на паркетот уште од самиот почеток на натпреварот и ја презеде улогата на лидер во својот тим.
Тој го заврши натпреварот со 31 поен, 7 скока и две асистенции, заедно со ефект од 14/20 шут за два поени. Тој беше и единствениот играч со двоцифрен учинок во победничкиот тим. Кај Италијанците се истакнаа Николо Мели со 15 поени.
Пред своите навивачи во Катовице, Полјаците остварија многу важна победа на почетокот од натпреварувањето во Групата Д победувајќи ја Словенија со 105:95. Со ова Полска веќе направи голем чекор кон пласман во осминафиналето.
Џордан Лојд со 32 поени беше најефикасен во полскиот тим, погоди седум тројки од осум обиди, а одличен беше и Понитка со 23 поени и 7 скока.
34-те поени на Лука Дончиќ (3/9 за три поени), заедно со 9 асистенции и четири скока, не им помогнаа на Словенците. Едо Муриќ постигна 17 поени.
