Македонскиот репрезентативец, Андреј Митревски е едно од новите засилувања на КК Пелистер за новата сезона. Младиот кошаркар има голем потенцијал, кој може да се развива токму во Битола бидејќи овој тим одлучи да оди ниво погоре – да се натпреварува на европска сцена.
Пелистер во петок ќе игра квалификациски турнир за пласман во ФИБА Лигата на шампиони,а доколку не успее да стигне до последната фаза, има загарантирани шест меча во ФИБА Евро-Куп.
„Сакам да се заблагодарам на раководството што ми дадоа шанса да бидам дел од овој тим што ќе настапува на сериозно ниво во европската кошарка. Без разлика дали ќе влеземе во ЛШ или ќе играме во ФИБА Европа купот, ова е многу голем чекор како за македонските играчи во Пелистер, така и за сите во клубот. Ова треба да биде поттик и за останатите македонски екипи да играат на ова ниво, за да видиме реално на кое ниво се наоѓа македонската кошарка. Верувам дека ќе добиеме многу искуство како тим од овие европски предизвици и целта ќе ни биде да стигнеме што подалеку…. Што се однесува до домашното првенство, знаеме дека битолчани сакаат кошарка, она што недостига е пехар, во последните години беше блиску до тој пехар, секако дека желба ни е да освоиме трофеј за клубот и за верните навивачи. Презадоволен сум и од условите за работа и од приемот во градот, од навивачите, од соиграчите, чувствувам многу позитивна енергија и се надевам дека тоа ќе не краси и во текот на целата сезона“, истакна Андреј Митревски.
