Брегалница е во налет, тимот на Влатко Костов влезе во победничка серија и затоа се врати еуфоријата под Исарот. Градот Штип почна да верува дека оваа Брегалница може да се ја оствари целта – враќање во елитата. По вчерашната победа на гости кај Детонит направен е голем чекор до ПМФЛ. Брегалница има и натаму +2 бода пред Скопје, Охрид и Шкендија Арачиново, има да играат уште пет кола, но јасно е дека сега и Брегалница се прашува.
Вчера во Радовиш за својата Брегалница навиваа фановите на овој клуб и затоа денеска раководството на штипските “сини“ јавно, преку своите социјални мрежи им се заблагодари на поддршката.
“Како фудбалски колектив, упатуваме огромна благодарност до нашата верна публика, фанови, поддржувачи и љубители на фудбалот за безрезервната поддршка која ја добиваме во овие важни моменти за нашиот клуб. Посебен наклон за нашиот 12-ти играч НК Фаланга и НК Ултра Банда, чие присуство на стадионите ширум Македонија, ни дава посебна мотивација и ветер во грб!
Уште побројни, уште посилни, заедно сплотени до целта!“ истакнаа од ФК Брегалница.
