Четирите натпревари од Светското првенство во 2026 година одиграни вчеравечер и ноќеска привлекоа вкупно 281.223 гледачи на стадионите, што е нов рекорд за посетеност во еден ден од турнирот, објави ФИФА.
Претходниот рекорд датира од 28 јуни 1994 година, пред 32 години, исто така во Соединетите Американски Држави: тој ден беа присутни 277.070 навивачи.
Натпреварите меѓу Франција и Сенегал (Њујорк), Ирак и Норвешка (Филаделфија), од Група I, како и Аргентина и Алжир (Канзас) и Австрија и Јордан (Сан Франциско), од Група J, сите во Соединетите Американски Држави, го означија шестиот ден од натпреварувањето.
„16 јуни 2026 година ќе биде ден врежан во историјата на Светското првенство во фудбал! Неизмерно сум благодарен на нашите навивачи што донесоа боја, атмосфера и емоции на овој турнир. Најинклузивното Светско првенство во фудбал досега продолжува да покажува колку е сакан нашиот спорт и како фудбалот го обединува светот“, нагласи Џани Инфантино, претседател на ФИФА.
Бројот на гледачи на турнирот досега веќе надмина 1,3 милиони, а со просек од 65.483 навивачи по натпревар, Светското првенство ова лето е на добар пат да го надмине рекордот од 1994 година од 3,5 милиони посетители.
