Напаѓачот на Манчестер Сити, Ерлинг Халанд, заедно со својот татко, поранешниот норвешки репрезентативец Алф-Инге Халанд, на аукција купи печатено издание од 1594 година на „Сагите за кралевите“ од Снори Стурлусон. За книгата платија 1,3 милиони норвешки круни, односно околу 134.000 американски долари, со што беше поставен нов рекорд за најскапо продадена книга во историјата на Норвешка.
Самата книга претставува вистинско историско богатство. Станува збор за првото печатено норвешко издание на „Хајмскрингла“ – збирка саги што исландскиот историчар Снори Стурлусон ја напишал околу 1230 година. Во неа се раскажува историјата на норвешките и шведските кралеви, почнувајќи од легендарната династија Инглинзи, па сè до Харалд Убавокоси, кој се смета за првиот крал на Норвешка. Ова издание од 1594 година, според проценките, е единствениот зачуван примерок од ваков вид во светот.
Наместо да ја задржи оваа ретка книга во својата приватна колекција, Халанд одлучи да ја донира на јавната библиотека во Брине, малото место во југозападниот дел на Норвешка каде што пораснал. И тој и неговиот татко се школувале во општината Тајм, а бабата и дедото на Ерлинг работеле како наставници во локалните училишта. За семејството Халанд, оваа донација не е само чин на дарежливост, туку начин да му се оддолжат на местото кое ги изгради.
Халанд имал и јасна желба за тоа како книгата треба да биде изложена. Тој побарал таа постојано да биде достапна за јавноста, отворена и изложена, за посетителите да можат да ги читаат приказните за луѓето кои потекнуваат од истиот крај како и тој. Според него, луѓето многу полесно развиваат љубов кон читањето кога во книгите ги препознаваат сопствените корени, луѓето и местата што им се блиски.
Воедно, Халанд искрено признал дека никогаш не бил голем љубител на читањето. Иако потрошил повеќе од 130.000 долари за едно ретко историско дело, вели дека сакал на другите да им ја овозможи шансата што самиот можеби никогаш не ја искористил. Додал дека имал среќа својот сон да го оствари преку фудбалот, но дека не секој ја добива таа можност. Токму затоа, книгите, според него, им овозможуваат на многу повеќе луѓе да сонуваат, да учат и да замислат поинаква иднина.
Донацијата не завршува само со вредниот ракопис. Општината Тајм, во соработка со фондацијата EH9 Foundation, од следната учебна година ќе организира натпревар во читање за учениците од основните училишта. Одделението што ќе прочита најголем број книги ќе биде наградено со патување во Осло, каде што во живо ќе го следи натпреварот на фудбалската репрезентација на Норвешка на стадионот „Улевал“.
Градоначалникот на општината изјави дека заедницата е неизмерно благодарна, не само поради вредната донација, туку и поради фактот што Халанд, денес веројатно најпознатиот Норвежанец во светот, никогаш не заборавил од каде потекнува.
