Арсенал ја пренасочи потрагата по нов крилен напаѓач кон Кенан Јилдиз, кој наводно е подготвен да побара заминување од Јувентус. Турскиот репрезентативец стана приоритет за тренерот Микел Артета откако пропадна можноста за ангажман на Винисиус Жуниор, кој го продолжи договорот со Реал Мадрид.
Во прилог на Арсенал оди информацијата дека турскиот репрезентативец сака кариерата да ја продолжи токму во Лондон. По серијата одлични настапи во Серија А, Јилдиз се потврди како еден од најперспективните млади фудбалери, а сега е подготвен да му соопшти на раководството на клубот дека сака трансфер.
Според пишувањата 21-годишниот фудбалер има намера јасно да го изрази својот став и желбата за преселба во северен Лондон. Сепак, реализацијата на трансферот ќе зависи од преговорите, бидејќи италијанскиот клуб поставил цена од 138 милиони евра, што ќе биде сериозен тест за буџетот на Арсенал.
Јилдиз и претходно се поврзуваше со Арсенал, сега клубот веќе официјално се распрашувал за неговата достапност, но Јувентус тогаш одговорил дека фудбалерот не е на продажба.
Ситуацијата сега би можела да се промени бидејќи наводно самиот играч инсистира на заминување. Интересот за Јилдиз дополнително се зголеми откако првата мета на Арсенал, Винисиус Жуниор, оваа недела потпиша нов долгорочен договор со Реал Мадрид.
Статистиката покажува дека Јилдиз би можел значително да го подобри нападот на Арсенал, кој минатата сезона повремено беше неефикасен. Анализата на платформата „WhoScored“ покажува дека негови главни квалитети се дриблингот, реализацијата и клучните додавања.
Јилдиз имаше одлична сезона 2025/26, во која постигна 11 голови и запиша девет асистенции во сите натпреварувања. Токму поради таквата продуктивност, многумина сметаат дека би бил подобра опција од Габриел Мартинели, чија форма во последната година беше нестабилна.
Останува да се види дали Јилдиз ќе остане главна цел на Арсенал до крајот на летниот преоден рок. Доколку сумата од 138 милиони евра се покаже како превисока, раководството на клубот би можело да се насочи кон други решенија.
Во тој случај, Арсенал би можел повторно да го насочи вниманието кон крилниот фудбалер на Пари Сен Жермен, Бредли Баркола. „Индипендент“ наведува дека Арсенал и понатаму е заинтересиран за францускиот фудбалер, но за него интерес покажува и Ливерпул, што би можело дополнително да ги искомплицира преговорите.
