Место најдобрата партија на ова Европско, македонската репрезентација го одигра еден од најслабите натпревари на досегашните учества на континенталните собири и со пораз од Португалија 3:0 (25:13, 25:20, 25:20) ги загуби шансите да се надева на пласман во осминафиналето. Пред 50-тина македонски навивачи во Арената Софија, избраниците на селекторот Јошко Миленксоски не прикажаа ни 50% од своите вистински можности и дозволија сами да им ја препуштат победата на противниците, кои сега ќе го чекаат нашиот исход од дуелот со Израел за евентуално да се протнат во нокаут-фазата.
На стартот на мечот Португалија тргна со три поени во низа (0:3). Ние успеавме да ја стабилизираме играта и да дојдеме до прво израмнување со поенот на Љафтов за 6:6. Следуваше нова серија наши грешки, по кои Португалците се враќаат на плус три за (6:9) и прв тајм-аут за Миленкоски. Португалија продолжи во иста серија и на 7:12 нашиот селектор беше приморан да го искористи и вториот тајм-аут. Ништо не се промени до средината на сетот кога Португалија веќе имаше капитал од 8 поени (9:16). Потоа видовме неразбирлива тотална немоќ на нашата репрезентација, а Португалија како од шега го доби сетот со високи 13:25.
Вториот сет го почнавме многу подобро. Иако Португалија прва дојде до предност од два поени (5:7), успеавме брзо да се соземеме, да влеземе во ритам и да го свртиме резултатот во наша полза. Поведовме со 10:8 по што португалскиот селектор беше приморан да повика минута одмор. Тоа очигледно им дојде одлично на Портгалците, кои во продолжение се вратија во ритам и дојдоа до предност од 13:15, по што Миленкоски мораше да побара тајм-аут. И покрај сите надежи, финишот на сетот беше во стилот на сите претходни кои го одигравме на ова првенство. Грешка за грешка и нов сет за Португалија, овој пат со 20:25.
Третиот сет го отворивме одлично. Стојан Илиев се врати во првата постава и нареди неколку поени во серија и дојдовме до предност од 6:3. Но, по рецептот од минатите два сета, Португалија брзо се врати и успеа да ја анулира предноста до 8:8. Следуваше период во кој и двете селекциии се менуваа во водство, се до 13:15 кога по неколку наши греши Португалците влегоа во ритам. Работите отидоа на полошо кога Португалија веќе стигна до 14:18, па Миленкоски го искористи и вториот тајм-аут. До крајот Португалија не испушти да ја казни нашата лоша игра и со 20>25 го затвори натпреварот.
Во нашиот тим по 8 поени имаа Илиев и Љафтов, додека Никола Ѓоргиев заврши со 6 поени. Кај Португалија доминираше Фереира со 17 реализации.
За Македонија останува уште утрешниот натпревар со Израел со кој ќе го завршиме четвртиот настап на континенталните првенства.
