Жарко Пешевски има големо срце. Македонскиот репрезентативен пикер одлучи да го стави на аукција дресот со потписи од сите репрезентативци, со цел да му помогне на Стефан Петрушевски.
Стефан е сопруг, татко на едногодишно дете и полициски службеник кој својот живот го посветил на заштитата и безбедноста на другите. По тешката несреќа која засекогаш му го промени животот, Стефан ја води најважната битка – битката за своето здравје и за иднината со своето семејство.
„Хуманоста не познава граници, вера и националност. Да бидеш хуман е доблест и човечка особина која секој од нас ја носи во себе. Спортот и спортистите знаеле и знаат да пружат рака кога е најпотребно.
Секој од нас води битки во животот. Некои на терените за своите клубови и репрезентации, а некои во секојдневието, борејќи се за подобро утро за себе и за своето семејство.
Еден од нив е и Стефан Петрушевски. Го игра најважниот натпревар и ја води најголемата битка во својот живот. Другар, пријател, професионалец во својата професија, грижлив родител и сопруг.
Потребно е да му помогнеме и знам дека ќе успееме во оваа хуманитарна мисија. 🙏
Поради сето горенаведено, со една цел – Стефан да успее во своето најважно животно поглавје – денес го објавувам овој дрес на ракометната репрезентација на Македонија, за кој не треба да се трошат зборови.
Сите знаеме што значи и каков симбол на успех и заедништво претставува за целата наша држава во моментите кога игра Македонија.
Почетната цена за дресот со потписи од сите играчи кои беа дел од последниот натпревар меѓу Македонија и Романија на Европското првенство е 6.000 денари.
Оваа мини-аукција ќе трае до петок во 21:00 часот.
Средствата ќе бидат донирани.
Контакт – ДМ“, напиша Пешевски на својот Инстаграм-профил.
View this post on Instagram
