Арсенал се врати на врвот во Премиерлигата во очи на големото попладневно дерби од 17. коло меѓу Ливерпул и Манчестер Ј. Денеска на „Емирати“ момците на Микаел Артета одиграа одличен натпревар против Брајтон и со 2:0 дојдоа до трите бода со кои прогресираа до врвот на табелата.
„Топчиите“ во текот на сите 90 минути беа подобар тим на теренот и прашање на време беше кога ќе го потврдат триумфот и трите бода. На прв гол се чекаше до 53. минута, кога Габриел Жезус успеа да погоди со глава на втората статива и да донесе радост за домашните фанови.
Конечните 2:0 ги постигна Каи Хаверц по едно одлично додавање од Нкетиа во 87. минута од средбата.
Голема победа денеска обезбеди и Астон Вила и тоа со пресврт на гости кај Брентфорд. Иако домашните успеаја да го отворат резултатот во финишот на полувремето со голот на Луис-Потер, некако ги пресече црвениот картон на Ми во 71. минута. Оттугаш, па до крајот на мечот, момците на Унаи Емери успеаја да ја преземат играта и со головите на Морено и Оли Воткинс да направат голем пресврт и да ги освојат трите бода кои и натаму ги држат на самиот врв на табелата, со еден бод минус во однос на Арсенал.
Вест Хем покажа тотална доминација и со 3:0 гопрегази Вулверхемтон. Кудус постигна два, а Боувен еден од погодоците за „чеканите“.
