Струга Трим Лум има четири победи во низа и сака да ја продолжи и на денешниот дуел против Башкими. Гостите неколкупати покажаа дека можат да биде мошне непријатни, а тимот на Бледи Шкемби не сака да си дозволи нов кикс како оној против Брера на домашен терен.
Дефанзивецот Жержу Маудо добро се вклопи во составот по доаѓањето од Сандерфјорд и најавува дека Струга Трим Лум ги посакува трите бода.
„Ова нема да биде лесен натпревар. Секоја средба до крајот на сезоната е исклучително важна за нас како екипа. Подготвени сме и како и на секој натпревар ќе се бориме за трите бода. Нашите навивачи се среќни само кога победуваме“, изјави Маудо.
По 14 одифрани кола, Струга Трим Лум има 11 победи, две ремија и само еден пораз, и се наоѓа на второто место на табелата.
Башкими денес ќе се обиде да освои вредни бодови во тежок натпревар на гостински терен против еден од најсилните тимови во лигата, Струга Трим Лум. Овој натпревар, кој е дел од 15-тото коло, доаѓа во тежок момент за кумановчани, кои се наоѓаат во резултатска криза по поразот од Тиквеш со 3-0. Аган Сулејмани кој неодамна доби покана од македонската репрезентација под 20 години, верува дека тимот е најопасен токму кога е под притисок.
„Силна игра, многу силен противник. Ќе се обидеме да ‘уловиме’ нешто во Струга. Башкими е во резултатска криза, но токму тогаш сме најсилни и најопасни. Убеден сум дека ќе го ‘освоиме’ градот на Дрим,“ изјави Аган Сулејмани.
Ова ќе биде втора средба меѓу двата тима оваа сезона. Првиот натпревар во Куманово заврши убедливо во корист на струшкиот тим, кој триумфираше со висок резултат од 5:0.
Натпреварот започнува во 12:30 часот.
