Фудбалскиот свет е во исчекување на вториот полуфинален меч на СП, оној меѓу Англија и Аргентина. Ова е дуел кој има предисторија и не само на фудбалски теми. Војна, омраза, демони од минатото, “голот на векот“, а најмногу “Божката рака на Марадона“ од пред 40 години. Тука се оние мечеви на СП од 1998 и 2002 година.
Сепак, минатото да го оставиме на страна, пред нас вечерва од 21 часот е мега – спектакл меѓу Англија и Аргентина, барем сите сакаме да биде мега спектакл.
Во битката за трофејот во недела, победникот ќе се соочи со Шпанија, која синоќа ја елиминираше Франција по 2:0. Поразениот ќе ги одмери силите во малото финале против „петлите“.
Двата тима пристигнуваат во Атланта по серија тешки победи. Англија, под водство на Томас Тухел, демонстрираше исклучителна отпорност, победувајќи ја Норвешка со 2:1 во четвртфиналето. „Трите лава“ забележаа победи и против Мексико (3:2) и ДР Конго (2:1) во елиминациската фаза, покажувајќи карактер во критичните моменти. Аргентина, од своја страна, продолжува со одбраната на титулата со импресивна ефикасност. Предводени од големиот Лионел Меси, „Гаучосите“ ја победија Швајцарија со 3:1 по продолженијата во претходното коло. Тимот на Лионел Скалони претходно ги победи Египет (3:2) и З. Острови (3:2), и досега има 100% резултат на победи на турнирот.
Фокусот несомнено ќе биде на двете големи ѕвезди – Лео Меси и Хари Кејн. Меси е во неверојатна форма со 8 гола и 2 асистенции досега, предводејќи ја ранг-листата на „Златната копачка“. Хари Кејн не заостанува многу со своите 6 гола, како главен стрелец на англискиот напад. Џуд Белингам е исто така клучен фактор за Англија, импресионирајќи со својата физичка издржливост и над 328 спринтови од почетокот на првенството. Статистиката покажува исклучително изедначени сили: Аргентина постигнува просек од 2,8 гола по натпревар со 65% посед, додека Англија одговара со 2,2 гола и 64% посед. Историски гледано, Англија има мала предност во официјалните натпревари со 6 победи наспроти 3 за Аргентина.
Томас Тухел се соочува со сериозни главоболки во одбраната и средниот ред. Џордан Хендерсон е надвор од игра поради скршен зглоб, а Џарел Кванза отслужува суспензија. Добрата вест е дека Деклан Рајс се опорави од болест. Ситуацијата во кампот на Аргентина е помирна – Кристијан Ромеро и Леандро Паредес беа принудени да го напуштат натпреварот против Швајцарија, но се очекува да бидат подготвени за игра од првата минута.
