Кошаркарскиот клуб Работнички го промовираше своето ново засилување за претстојната сезона, американскиот крилен играч Џаксон Елингсворт.
Станува збор за 206 сантиметри високиот кошаркар, кој во изминатата сезона настапуваше за Арканзас Стејт во NCAA-лигата. Елингсворт одигра 32 натпревари во сезоната 2025/26, со просек од 9,7 поени и 4,8 скока по натпревар.
Американецот се истакна и со добар шут од дистанца, реализирајќи 34,7 проценти од обидите за три поени. Во Работнички очекуваат новото засилување да донесе дополнителна енергија во нападот, но и поголема сигурност во скокот.
