Јокиќ е вториот играч во историјата со 200 трипл-дабл остварувања
Денвер Нагетс ги победија Њу Орлеанс Пеликанс со 104:91, а прво име на натпреварот беше Никола Јокиќ. Српскиот центар го оствари својот 200. трипл-дабл во НБА-кариерата, забележувајќи 21 поен, 13 скока и 10 асистенции. Тој стана вториот играч во историјата на натпреварувањето кому му успеало ова достигнување.
Пред него е само Расел Вестбрук, кој во текот на кариерата оствари 209 трипл-дабл учиноци. Јокиќ, кој ја игра својата 12. сезона во НБА-лигата, дополнително се приближи до апсолутниот рекорд.
Денвер во првото полувреме имаше предност од 22 поени, но Њу Орлеанс во последната четвртина успеа да се доближи на само пет поени негатива.
Сепак, Нагетс ја задржаа предноста, а Џамал Мареј со 23 поени и Кристијан Браун со неколку важни тројки помогнаа тимот да стигне до победата.
Кари со 44 поени за победа на Голден Стејт
Стефен Кари ги предводеше Голден Стејт Вориорс до победа од 119:114 против Минесота Тимбервулвс. Постигна 44 поени, најмногу за него оваа сезона, со осум скока и шест асистенции. Погоди шест тројки и сите 16 слободни фрлања.
Голден Стејт во текот на натпреварот имаше предност од дури 24 поени, но Минесота успеа да се врати и да се закани во завршницата. Кари со слободните фрлања ја потврди победата на Вориорс, за кои ова беше втор триумф по ред, откако сезоната ја започнаа со три порази.
Руки-играчот Јаксел Лендеборг додаде 26 поени за победничкиот тим. Минесота настапи без повредениот Ентони Едвардс, а најефикасен во нејзините редови беше поранешниот играч на Голден Стејт, Џонатан Куминга, со 20 поени.
Далас Маверикс приреди изненадување, совладувајќи го Оклахома Сити Тандер со 120:96 и нанесувајќи му го првиот пораз сезонава.
Херој на домашниот тим беше 19-годишниот Купер Флег, првиот пик на НБА-драфтот во 2025 година. Тој постигна 26 поени, подели осум асистенции и забележа пет скока, а притоа не загуби ниту една топка.
Далас на почетокот од третата четвртина направи серија од 11:0 и целосно ја презеде контролата врз натпреварот. Оклахома во второто полувреме постигна само 37 поени и погоди само пет од вкупно 32 обиди за три поени.
Аџеј Мичел беше најефикасен кај Тандер со 29 поени, додека Шеј Гилџес-Александер додаде 21. Оклахома настапи без неколку важни играчи, меѓу кои беа Чет Холмгрен и Џејлен Вилијамс.
НБА – РЕЗУЛТАТИ
Атланта Хокс – Мајами Хит 117:129
Кливленд Кавалирс – Вашингтон Визардс 121:111
Детроит Пистонс – Шарлот Хорнетс 97:89
Индијана Пејсерс – Филаделфија 76ерс 109:114
Торонто Репторс – Орландо Меџик 129:99
Чикаго Булс – Њујорк Никс 127:133
Милвоки Бакс – Хјустон Рокетс 100:132
Минесота Тимбервулвс – Голден Стејт Вориорс 114:119
Њу Орлеанс Пеликанс – Денвер Нагетс 91:104
Јута Џез – Сан Антонио Спарс 111:117 (по продолжение)
Далас Маверикс – Оклахома Сити Тандер 120:96
Лос Анџелес Клиперс – Лос Анџелес Лејкерс 87:103
