Се чини дека деновите на Алехандро Балде во Барселона се избројани. Одлуката на тренерот Ханси Флик повторно да не смета на него, дури и во момент кога каталонскиот тим има сериозни проблеми со повредени дефанзивци, дополнително ги засили шпекулациите дека левиот бек ќе го напушти „Камп Ноу“ во јануарскиот преоден рок.
Според пишувањата на шпанските медиуми, Барселона планира да ја засили одбраната во зимскиот преоден рок, но за да реализира нови трансфери ќе мора да ослободи место и финансиски средства. Балде е посочен како еден од главните кандидати за заминување, а неговата ситуација во тимот е дополнително комплицирана поради нарушениот однос со Флик.
Интерес за 23-годишниот дефанзивец имало и во летниот преоден рок, меѓу другите и од англискиот фудбал, но тој тогаш одлучил да остане и да се бори за своето место. Флик претходно изјави дека на Балде му недостига самодоверба потребна за да го достигне највисокото ниво.
