Поранешниот тренер на Милвоки Бакс, Док Риверс, откри со какви проблеми се соочувал додека во неговиот тим настапуваше Јанис Адетокумбо.
Американскиот стратег призна дека не било лесно да се справи со сите предизвици што ги носи тренерската работа со ѕвезда од калибарот на Јанис.
Риверс конкретно го посочи недостатокот на реализација на договорените акции во клучните моменти како една од најголемите причини поради кои било тешко да се работи со грчкиот кошаркар.
„Не е лесно да се работи со него бидејќи игра со неверојатно темпо и постојано оди директно кон кошот. Некому му реков: тој е одличен асистент, но тоа не значи нужно дека има исклучително висок кошаркарски коефициент на интелигенција. Тоа е чудна комбинација“, изјави Риверс.
„Во најголем дел игра на еден начин: оди директно кон кошот и форсира, форсира, форсира. Во секој напад сака да оди на сила. Понекогаш посакував подобро да ги спроведува договорените акции“.
Риверс го спореди Јанис со кошаркарите од американскиот младински ААУ-систем, кои се навикнати самостојно да ги завршуваат нападите бидејќи се доволно квалитетни, па во помладите категории често немаат потреба од воиграни акции.
„Му реков на Јанис дека сè уште треба да научи колку е важно да се спроведуваат договорените акции. На тренингот, како и на шутерскиот тренинг пред натпреварот, мора да бидеш целосно фокусиран на тоа. Сега има тренер кој е меѓу најдобрите во таа област и тоа е добро за него“.
Риверс објасни и зошто, според неговото мислење, индивидуалниот квалитет не е доволен.
„Многу играчи размислуваат: ‘Тоа не ми треба, можам сам да го направам’. Можеш, но за да функционира екипата, мораш да научиш да го одиграш она што е договорено“.
