Голден Стејт Вориорс би можеле значително да го променат својот тим за следната сезона, бидејќи планираат да доведат неколку кошаркари, а меѓу потенцијалните засилувања би можел да се најде и Никола Јокиќ.
Голден Стејт ја следи ситуацијата околу српскиот центар и се надева дека тој би можел да биде достапен следното лето, тврди НБА-новинарот Џејк Фишер.
„Вориорси се меѓу тимовите кои се прашуваат: Дали сме сигурни дека Никола Јокиќ нема да биде достапен следното лето? Се надеваат дека би можеле да имаат доволно простор во платниот буџет за максимален договор, а го имаат и Стеф Кари“, изјави Фишер.
Тој се повика на извор запознаен со ситуацијата во клубот, според кого Вориорси и понатаму веруваат дека можат да привлечат голема НБА-ѕвезда. Како пример го посочи Џими Батлер, чиј ангажман, според него, се покажа како добар потег пред кошаркарот да се повреди.
„Не успеаја да го доведат Јанис Адетокумбо, а Кевин Дурент не сакаше да се врати кога за тоа се разговараше кон крајот на еден од претходните преодни рокови. Сепак, и понатаму веруваат дека следното лето можат да доведат големо име, било преку размена или на пазарот на слободни агенти“, додаде Фишер.
Фишер не спомена конкретна понуда ниту, пак, преговори за Јокиќ. Засега станува збор само за тоа дека Голден Стејт ја следи можноста да се отвори ваква прилика.
