Лидерот на Истокот, Милвоки славеше против Орландо со 134:123 и ја постигнаа 18-та победа во последните 19 натпревари во НБА лигата. Бакс ги предводеа Брук Лопез со 26 поени и шест скока, Крис Мидлтон со 24 поени со 11 асистенции и Џевон Картер со 24 поени.
Од тимот поради болест отсуствуваше Јанис Антетокунмпо, а поради проблем со вратот го немаше и Џру Холидеј што на победата и дава посебна тежина.
Кошаркарите на Далас ја победија Јута со 120:116 и се израмнија со Голден Стејт на петтото место на Западот. Кајри Ирвинг со 33 поени, од кои 17 постигна во последниот дел со решавачка тројка беше лидер во составот на тексашаните, каде Лука Дончиќ додаде 29 поени, 10 скока и шест асистенции.
Лејкерс го победија Мемфис со 112:103 и се искачија на деветтото место во Западната конференција, кое води во плеј-офот. Ентони Дејвис со 30 поени и 22 скока и Денис Шрудер со 17 поени и девет асистенции беа најзаслужни за успехот на домашните. За време на полувремето, Лејкерс на свечена церемонија го повлекоа дресот со број 16 што го носеше легендарниот Шпанец Пау Гасол. Тој играше во три финалиња на НБА со Лејкерс и освои две титули откако беше трејдуван од Мемфис во 2008 година.
НБА РЕЗУЛТАТИ:
Орландо – Милвоки – 123:134
Детроит – Вашингтон – 117:119
Њујорк – Шарлот – 105:112
Минесота – Филаделфија – 94:117
Оклахома Сити – Голден Стејт – 137 :128
Хјустон – Бруклин – 96:118
Далас – Јута – 120:116
ЛА Лејкерс – Мемфис – 112:103
