По четири одиграни кола во Првата лига во Работнички се вклучи алармот. Најтрофејниот кошаркарски колектив влезе во серија од два порази во домашниот шампионат. Првиот удар на „црвено-белите“ им го нанесе Чаир 2030, а вториот и се чини најтешкиот дојде од вечниот ривал, МЗТ Скопје. Наместо неизвесна пресметка, дуелот во „Кале“ се претвори во лесен тренинг за тимот од Аеродром.
Овој епилог го фрли во очај Работнички, а одговорноста за ќе ја сноси Димитар Мираковски. Иако се уште нема ништо официјално, сепак е познато дека младиот тренер и раководството на клубот ќе се разделат.
Во јавноста се шпекулира со имињата околу наследникот на Мираковски. Јорданчо Давитков и Горан Самарџиев беа првите две опции кои се појавија во јавноста за тренерското место на клупата на најтрофејниот кошаркарски колектив.
Најновото од Работнички е Саша Димитријевиќ. Поранешниот младински селектор во машка и женска конкуренција е една од опциите за клупата на „црвено-белите“.
Тој неколку години мина во Малта каде беше еден од одговорните за работа во младинските селекции на оваа земја, а со клубот освои три национални Купа, беше координатор за женска кошарка во Македонија, а во моментов работи на прокетот „Кошарка во количка“.
Димитријевиќ е сосема различен профил од Давитков и Самарџиев, па може да донесе поинаква перспектива во редовите на Работнички, бидејќи е познат по својата дисциплина за работа и дава шанса на млади кошаркари.
За денеска е најавена седница на Управен одбор на која ќе бидат решени многу дилеми.
