Денеска попладне околу 18 часот фудбалерите на Англија ќе пристигнат во Скопје, каде утре од 20:45 часот го играат дуелот со Македонија во рамките на последното коло од квалификациите за ЕП 2024.
Селекцијата која е меѓу најдобрите, ако не и најдобра во моментов во светот одамна го завери првото место во групата со сите победи и едно реми како гости на Украина, но и убедливи 7:0 над нашиот национален тим од јуни годинава во Манчестер.
Англија во Скопје доаѓа со свој контингент на готвачи, медицински тим, обезбедување, организациски одбор… Уште при слетувањето фудбалерите на „Гордиот Албион“ ќе имаат посебен третман. Од авион преку посебен излез на аеродромот ќе заминат кон хотелот „Мериот“ во центарот на Скопје.
ВИП третман ќе имаат дури и нивните економи кои се задолжени за опремата која ќе се товара во посебни камиони. СпортСпорт дојде до протоколот и од истиот дознаваме дека селекторот Герет Саутгејт нема да ги изнесе фудбалерите на арената „Тодор Проески“, и нема да биде вообичаениот термин во времето на одигрување на натпреварот. Англичаните ја „букирале“ за денеска целата сала „Јане Сандански“ за каде е планиран футинг тренинг и „истегање“ на фудбалерите по летот од Бирмингем до Скопје. Селекторот Саутгејт и капитенот Хери Кејн се најавени како двајцата од Англија кои ќе се појават на вообичаената прес конференција пред натпреварот која ќе се одржи во прес салата на нашиот најголем стадион. Од друга страна и обезбедувањето и движењето околу хотелот „Мериот“ ќе биде под строг режим. Бараат ВИП третман а треба да знаат дека нашата делегација по мечот во Манчестер остана да дреме 2 часа во авионот пред полетување поради мрзливоста на аеродромските служби кои со часови го подготвуваа авионот за лет кон Скопје и доцнеа со багажот.
Реципроцитет треба да им направиме и да видат ниски удари какви што тие самите ги прават. Така беше и во минатото кога „Гордиот албион“ гостуваше во Скопје. Пиле не смееше да прелета…
