Македонската женска ракометна репрезентација обезбеди пласман на Европското првенство 2024 година на едно коло до крајот на квалификациите. Печат на визата за континенталното натпреварување нашите девојки ставија во Баку, каде убедливо славеа против Азербејџан.
Многу порано пред стартот на ЕХФ неделата, Ракометната федерација на Македонија на својата официјална страница сподели неколку одлуки на Управниот одбор, една од нив беше премијата за пласман на ЕП 2024 година. Ракометарките за овој историски успех, велиме историски, бидејќи преку квалификации со чисто македонски репрезентативки се чекираше на ЕУРО, ќе поделат парична награда од 2.000.000 денари.
До крајот на овие квалификации останува мечот против Литванија, кој нема резултатско значење за Македонија, но „црвено-жолтите“ посакуваат со победа да го затворат овој циклус. Мечот се игра во недела (18 часот) во СЦ „Борис Трајковски“, а влезот е бесплатен. Па сите во таборот очекуваат голема поддршка од трибините.
