По триумфот над МЗТ Скопје во Првата лига, екипата на Пелистер се врти кон настапите во АБА2-лига, а таму денеска се гости на Подгорица (18 часот). На стартот на ова натпреварување битолчани остварија победа над Широки потврдувајќи дека оваа сезона навистина ќе биде поинаква од останатите.
Голем проблем за тренерот Александар Петровиќ е повредата на центарот Андреја Бојиќ, која ја заработи против МЗТ Скопје. Предводникот на Пелистер вели дека одат да се надигруваат и добро да ја презентираат македонската кошарка.
Бобан Стајиќ по една година пауза повторно го носи дресот на Пелистер, давајќи знaчаен придонес во добриот старт на сезоната.
„АБА-лигата е натпреварување во кое сакаме да се претставиме во што подобро светло. Во првото коло славевме над Широки, а сега ни следи и првото гостување против Подгорица, тим што не ја започна сезоната онака како што посакуваше, но дефинитивно поседува квалитет за подобри резултати од досегашните. Наше е да го искористиме моментот на добра игра, да дадеме се од себе на теренот во текот на сите 40 минути и секако да се обидеме да стигнеме до победата“, порачува Бобан Стајиќ.
