За квалификациските дуелите против Естонија и Литванија за пласман на Европското првенство 2026 година, селекторот Кирил Лазаров одлучи да не го повика Филип Талески, кој до овој дуел имаше сигурно место во националниот тим. А на списокот на резерви се најде и Никола Митревски.
Лазаров на собирот отворено зборуваше за оваа тема. За Талески потенцира дека вратата не му е затворена, но дека во последниот период не бил на потребното ниво затоа шанса ќе добие Павле Атанасијевиќ.
Што се однесува до Митревски, идејата на Кире е да им даде шанса на младите да види како тие ќе функционираат кога го немаат како бекап искусниот голман.
„Ние сме во процес на подмладување на репрезентацијата што трае подолго време и треба да го користиме секој момент за овие млади играчи, кои сега играат и значајни натпревари за своите тимови, да добиваат шанса. Искрено, сакав да ги видам на дело другите голмани, на еден собир, низ тренинзи и натпревари, да видам како ќе делуваат и функционираат кога за грб ќе немаат еден врвен чувар на мрежата како што е Митревски“, рече Лазаров.
