Македонската машка ракометна репрезентација со победа ги отвори квалификациите за пласман на Европското првенство 2026 година. Избраниците на Кирил Лазаров на домашен терен ја совладаа Естонија со 37-33 (20-20). Нашите момци не блескаа цел меч како што се очекуваше, но најважно запишаа триумф.
Серафимов со десет гола беше прв стрелец, зад него беа Кузмановски и Митев со по седум погодоци.
Она што го предупреди Лазаров на стартот на подготовките се случи во втората половина од првото полувреме и во второто полувреме.
Македонија добро влезе во дуелот поведе со 4-1 со трите гола на Филип Кузмановски по само три минути игра, оваа позитива ја одржуваше до пред 15-та минута. На двапати поведовме со плус четири 12-8 и 13-9, а потоа целосно паднавме. Најголем проблем беше одбраната, Естонците покажа дека ако ги оставиш знаат да казнат и тоа го сторија. Трпеливо ги чекаа своите минути и ги дочекаа, со звкуот на сирената израмнија на 20-20 на одморот. Во овој период одбраната немаше поддршка и од голманите, Томовски и Кизиќ не запишаа ниту една одбрана.
Веднаш на стартот на првото полувреме поведоа со 20-21. Преку Серафимов израмнивме на 21-21, но и натаму не игравме според очекувањата. Естонија дури и успеа да направи атракција и по вторпат да поведе на оваа средба (22-23). На лошото издание немаше крај, во 41-та минута гостите поведоа со плус два (24-26). Лазаров повика тајм-аут, Серафимов и Џонов израмнија на 26-26, во меѓувреме и Кизиќ конечно се разбрани, па Македонија го врати водството со голот на Џонов 28-27 во 43 минута.
„Црвено-жолтите“ конечно фатија добри минути, добра одбрана, интервенција на Кизиќ, и три гола на Серафимов и еден на Кузмановски ја вратија Македонија на највисоките плус четири 32-28 во 49-та минута. И тука не застанаа, во 50-та минута беше плус пет (34-29), штета не искористија одбрана за Кизиќ за да го зголемат водството.
Од овој момент требаше да биде се полесно, но Естонците пристискаа, па во 55. минута намалија на 34-31. Македонија беше на три до четири гола позитива се до 58-та минута кога по наша грешка противникот успеа да доближи на 35-33. Ѓорѓиев постигна важен гол за 36-33 и најави дека ова ќе биде победа за Македонија.
Македонија во недела и гостува на Литванија во второто квалификациско коло за ЕП 2026.
