Вечерва се играат натпревари од Лига Европа и Лигата на Конференции.
Англискиот премиерлигаш Тотенхем се избрука на гостувањето кај Фереира во плеј-офот за пласман во групите на Лигата на конференциите. По триумфот над Манчестер Сити викендов во Премиер лигата, лондонската екипа си дозволи пораз на ова гостување во Португалија (1:0) па сега ќе мора да ги исправа работите на реваншот на „Вајт Харт Лејн“.
Тренерот Нуно Еспирито Санто реши да излезе со резервисти и со играчи од младинскиот погон. Од поискусните тука беа само Бен Фејвис, Џовани Ло Селсо, Хари Винкс. Сепак, Фереира успеа да дојде до победата со гол на Лукас Силва во првото полувреме.
Мечот меѓу Андерлехт и Витесе заврши со резултат 3:3, а текот беше вистински трилер. На полувреме водеше Андерлехт со 2:1, а во второто полувреме Витесе го сврте резултатот во своја корист (3:2) и имаше водство се до 90. минута кога домашните изедначија преку Вершерен. Во судиското продолжение Андерлехт имаше шанса за победа затоа што доби пенал, но Рафаелов место во мрежата ја затресе пречката. Па така Витесе доби шанса со триумф на домашен терен да го трасира патот до следната фаза.
Ријека за која не играше Дарко Велковски го напушти „Тумба“ со резултат 1:1. Лепињица донесе водство за Ријека, а ПАОК изедначи во последните секунди со автоголот на Галешиќ.
Линколн од Гибралтар продолжува да изненадува. Одигра 1:1 на гостувањето во Рига и сега на реваншот доколку победи ќе игра во групите на Лигата на конференциите што би бил историски резултат.
Мурињо со својата Рома запиша победа со 2:1 на гостувањето кај Трабзон.Лоренцо Пелегрини и новакот Шомуродов ја донесоа победата на „волчицата“.
Во квалификациите за Лига Европа Омонија славеше со 4:2 против белгиски Антверпен, Галатасарај одигра 1:1 на гости кај дански Рандерс, Славија Прага и Легија одиграа 2:2, а Штурм ја совлада Мура во гости со 3:1…
