По 12. пат, одбојкарите на Струмица се шампиони на Македонија во одбојка. Во четвртиот натпревар од финалната серија, бранителот на титулата повторно беше подобар од предизвикувачот Штип УГД и успеа да ја одбрани титулата која е во нивните витрини веќе седум години едноподруго.
ЧЕТВРТИ НАТПРЕВАР:
СТРУМИЦА – ШТИП УГД 3:1 (25:21, 25:19, 16:25, 25:23) / 3-1
Во четвртиот финален меч од плеј-оф серијата Струмица пред свои навивачи го совлада тимот на Штип УГД со 3:1 и со вкупни 3-1 во партии успеа да дојде до нов шампионски наслов. Струмица одлично го почна и денешниот меч, изгледаше поконцентрирано на теренот и со помалку технички грешки го преши првиот сет со 25:21.
Во вториот сет гостите се уште ја бараа својата игра, а Струмица тоа го искористи и успеа да дојде до 25:19 за предност од 2:0. Конечно во третиот сет видовме шампионска игра кај гостите. Доминираа во текот на целиот сет и на крајот убедливо дојдоа до 16:25 за 2:1 во сетови.
Комплетна одбојкарска драма видовме во четвртиот сет. Струмица почна силно, направи фантастична предност од 7 поени за 20:13, а потоа следуваше неверојатно враќање на Штип за 21:22, предност која најави дека можеби ќе гледаме и петти сет, но тоа не се случи. Струмица го преживеа овој сет и во втората сет-меч-топка, Кинтеро успеа да го освои 25. поен за домашните за конечни 25:23 и победа од 3:1.
Струмица првата титула ја освои во 1993 година, а шампионскиот пехар го креваше и во 2012, 2014, 2015, 2017, 2018, 2019, 2021, 2022, 2023 и 2024 година. Штип УГД ќе се обиде и следната година да го нападне шампионскиот трон, затоа што и оваа година покажа дека е рамноправен ривал на струмичкиот состав.
