Пелистер вечерва (18:45 часот) му гостува на Пик Сегед во меч од Лигата на шампиони и тоа само една недела по победата на домашен терен.
Шпанскиот стратег на кормилото на македонскиот првак потенцира дека овој пат на располагање ќе има поголем број на играчи, што е важно. Свесен е дека ќе биде потешко од Битола, но се надева на добар меч.
“Секогаш е убаво кога се добиваат натпревари во Лигата на шампионите. Тоа можат да го прават само топ-тимови од континентот. Задоволни сме од триумфот во Битола, но во исто време сме внимателни пред возвратниот дуел. Ќе биде потешко од првиот меч, тоа е сигурно. Добро е што полека се враќаме после сите оние потешки повреди на стартот од сезоната. Тимот е скоро комплетен и ќе можеме да имаме поширока ротација. ПИК Сегед исто така се мачеше со одредени повреди, ќе видиме што ќе се случи. Имаме голем простор за уште поголем напредок, мислам дека сликата за тимот е комплетна и очекувам да играме подобро со секој изминат натпревар. Не е време за конечниот расплет во групата, сега се фокусираме само на следниот натпревар. Ако можеме, сигурно ќе се бориме за пласман во втората рунда“, изјави Рубен Гарабаја, тренерот на Пелистер.
