Денеска продолжува актуелното 29. Коло од домашниот ПМФЛ шампионат, во кое на стадионот во Ѓорче Петров ќе се сретнат домаќинот Македонија и тимот на Работнички.
Оваа градска пресметка која инаку стартува до 16:00 часот значи само едно за двата тима. Освојување на бодови кои ќе значат и натаму шанса за останување во прволигашката конкуренција. Двата тима се во лоша состојба на табелата. Македонија е претпоследна, единаесетта со 24 бодови, додека Работнички е место погоре со четири бода повеќе.
„Лавовите“ седум кола немаат победа, и во нив имаат забележано само еден нерешен ресултат, оној против Брера, и шест порази.
Последен пат кога Македонија ЃП победи во домашниот ПМФЛ шампионат, беше токму дуелот против Работнички одигран на 4. Март, со конечни 3:1 токму на свој терен. Тогаш стреци беа, Адем, Стојчевски и Николиќ.
„Сиот овој период од таборот на Македонија ЃП се изјавува дека ќе се бориме до крај и дека нема откажување. Така е и овојпат. Одиме да победиме, да освоиме бодови, како денес така и на сите преостанати мечеви до крајот на шампионатот, и се надеваме на поволен развој на настаните за нас“, велат од Ѓорче Петров.
Муарем: Мечот во Ѓорче Петров е екстремно важен за Работнички
Тимот на Работнички продолжува со грчевитата борба за опстанок во елитата. По очајниот прв дел од сезоната, составот од Дебар Маало оваа пролет игра многу подобро, но сѐ уште се наоѓа во загрозената зона на табелата. Во последните пет кола, „романтичарите“ ќе се обидат со максимален ефект да се извлечат и да останат меѓу прволигашите и следната сезона.
Пред Работнички денеска е нов голем предизвик, тимот на Муарем Муарем гостува во Ѓорче Петров и ќе има дуел со еден од директните ривали за опстанок, Македонија ЃП.
„Мечот во Ѓорче Петров е екстремно важен за Работнички. Играме против директен ривал за опстанок и секога грешка може да биде кобна. Македонија ЃП игра многу подобро пред своите гледачи, а ние ќе мора да ги сведеме нашите грешки на минимум доколку сакаме да ја оствариме целта. Ги анализиравме нашите лоши потези од претходното гостување во Ѓорче Петров кога загубивме и подготвени сме да одиграме на многу подобро. Се надеваме на позитивен резултат за нас“, изјави тренерот на Работнички.
