Кошаркарската репрезентација на Словенија победи во 4.коло од групата Б на Европското првенство против Германија со 88:80.
Словенците вечерва го потврдија пласманот во осминафиналето, а впечатокот го подобрија по неодамнешниот пораз од репрезентацијата на БиХ.
Предводени од Лука Дончиќ, Словенците целосно ги надиграа домашните и целосно ја заслужија третата победа. Претходните две ги постигнаа во првите две кола против Литванците и Унгарците.
Словенците веќе водеа со 21:17 по првата четвртина, а во вториот дел имаа максимална предност од 14 поени. Германија успеа да ги консолидира своите редови и да ја намали негативата на едноцифрена бројка, 36:44 до заминувањето на пауза.
Во третиот дел Германија заостана само два поени, но потоа во последните 10 минути Словенија повторно се засили и на крајот лесно победи.
Натпревар за паметење имаше Лука Дончиќ со 36 поени, 10 скока и четири асистенции. Горан Драгиќ постигна 16 поени. Во германскиот тим Шрудер постигна 19 поени.
Во последното коло во групата Б утре се среќаваат Франција – Словенија, Германија – Унгарија и Босна и Херцеговина – Литванија.
