Александер Албон нема да вози на утрешната трка од Формула 1 за големата награда на Италија на патеката во Монца. Причина за отсуството на возачот на Вилијамс е здравствен проблем.
Како што објавија од тимот, тајландскиот возач воопшто не бил добар во текот на ноќта, па морал итно да замине на клиника, каде му било дијагностицирано воспаление на слепото црево, поради што мора на операција.
Вилијамс успеал да најде замена, па сепак утре ќе настапи и со двата болида. На местото на Албон ќе седне Ник Де Врис, кој денеска ќе се загрева за утрешниот старт на трката во Монца.
Де Врис (27) ќе го има своето апсолутно деби на трката откако неколку пати учествуваше на слободни тренинзи во последните неколку години како тест-возач на Мерцедес.
