Третото место веќе е „невозможна мисија“ за Силекс. Кратовскиот тим на крајот ќе заврши како четвртопласиран во ПМФЛ, а целиот фокус на избраниците на Александар Васоски ќе биде ставен во Купот на Македонија.
Затоа Силекс без резултатски или било каков притисок ќе се обидат да и го „попречат“ патот на Шкендија. И покрај тоа што за нив овој меч нема никакво значење, најавуваат дека до крајот ќе се борат за што повеќе бодови, и ќе се обидат да го изненадат противникот.
„Не очекува еден добар натпревар против квалитетен противник како што е Шкендија. Иако шансите за тоа трето место се минимални, ние на секој натпревар ќе играме како до сега, и ќе одиме на победа. Секако дека фокусот ни е во Купот, но и во првенството сакаме да освоиме што повеќе бодови. Шкендија е во трка за титулата, но нас тоа не ни значи ништо. Гледаме само за нас, и на секој натпревар до крајот, без разлика на противникот, ќе се надигруваме и ќе се обидеме да освоиме што повеќе бодови“, изјави капитенот на Силекс, Дарко Ангелески.
Пораз од Башкими, и веднаш заостанување од првото место за тетовска Шкендија. Разликата со Вардар сега изнесува четири бодови. Во финишот секоја грешка се плаќа, па така тетовските „црвено-црни“ ја платија по поразот на домашен терен.
Сега секоја нова грешка на Шкендија ќе го доближи Вардар уште повеќе до шампионската титула. Затоа тетовци немаат право на кикс. Едноставно, Кратово мора да биде освоено, да бидат освоени трите бода, ако се сака да се остане во трката за одбрана на шампионскиот пехар.
„Искрен да бидам, разочарани сме од последниот меч од Башкими. Не го заслуживме тој пораз, но нема запирање. Мораме да преземеме одговорност, да покажеме карактер и веднаш да реагираме против Силекс. Пред нас имаме незгоден противник, особено кога игра на свој терен во Кратово. Не очекува тежок меч. Добро ги анализиравме грешките од минатото, и мораме да влеземе во мечот со 100% концентрација. Фокусирани сме само на нашиот тим. Сите играчи се обединети и ќе го дадат максимумот за овој клуб. Нашата цел е јасна, а тоа е до последното коло да се бориме и да дојдеме до титулата“, рече Имран Фетаи, стоперот на Шкендија.
