Шкендија и Силекс на 20 мај на Арената “Тодор Проески“ во Скопје ќе ги одмерат силите за пехарот во Купот на Македонија. Ова е епилогот по попладневните реванш мечеви откако Шкендија како гостин во Куманово славеше против Шкендија Арачиново со 0:2, па така се севкупни 2:5 се најде во своето шесто финале и ќе атакува по третиот трофеј.
Силекс дома, пред своите фанови успеа да го победи Охрид со 1:0 и со вкупни 2:1 се избори за своето шесто финале во кое ќе игра по својот четврти пехар.
Очекувано, фаворитите се пласираа во финалето, а второлигашите се елиминирани.
Шкендија во Куманово во еден тврд меч успеа да слави со головите на Спахиу во 86. и Ндзенгуе во 88.минута за конечни 0:2. Во самиот финиш Вебстер доби црвен картон.
Во Кратово домашниот Силекс успеа да го победи Охрид со 1:0, со голот на Додев во 34.минута, иако според шансите победата требаше да биде изразена со најмалку 3-4 голови разлика. Алиќ не реализира пенал, а потоа не погоди од уште две зицер позиции. Имаше Силекс и други шанси, а Охрид за малку не ги казни избраниците на Александар Васоски во 68.минута кога Димитриески шутираше а голманот Џеков одбрани, сепак мора да се каже дека кратовци апсолутно заслужија пласман во големоо финале.
