Никако не престануваат проблемите со повредите за стратегот на Шкендија, Артим Положани. Ако се знаеше дека за утрешниот дерби меч со Струга ТЛ тој нема да може да смета на голманот Гаје и напаѓачот Ѓорѓиевски, сега и официјално утре нема да биде во составот и Фреитас, еден од клучните играчи на Шкендија.
Ова е соопштението на Шкендија во врска со овие тројца нејзини играчи:
„Бабукар Гаје ја започна фазата на враќање на тренинг, додека Рафаел Фреитас и Марко Ѓорѓиевски го продолжуваат процесот на закрепнување по неодамнешните повреди.
Додека тимот се подготвува за следните предизвици во првенството, медицинскиот тим интензивно работи за што побрзо враќање на повредените играчи. Во моментов, голманот Бабукар Гаје, играчот од средниот ред Рафаел Фреитас и напаѓачот Марко Ѓорѓиевски се надвор од комбинацијата.
Голманот Бабукар Гаје, откако ги следеше сите чекори од програмата за рехабилитација во Германија и помина низ дополнителни тестови, е позитивно оценет за напредокот на неговото закрепнување. Сепак, целосното закрепнување бара малку повеќе време отколку што беше предвидено во првичната проценка.
Гаје веќе се врати во Тетово за неколку дена и започна со индивидуални тренинзи со тренерот на голманите. Се очекува да се врати на целосен тренинг со групата следната недела, додека физичкиот тренер ќе ја даде конечната проценка кога ќе биде подготвен да се врати на теренот.
Бразилскиот играч од средниот ред Рафаел Фреитас претрпе истегнување на ректус абдоминис мускулот на последниот натпревар против Брегалница. Тој продолжува со терапија, додека следната недела неговата состојба ќе биде повторно проценета пред да се донесе одлука за негово целосно враќање на тренинзите.
Напаѓачот Марко Ѓорѓиевски се повреди на последниот тренинг пред вториот натпревар против Хибернијан, во квалификациите за Конференциската лига на УЕФА. Прегледите потврдија делумна руптура на аддуктор долгиот мускул.
Ѓорѓиевски продолжува со терапија, додека во текот на следната недела неговата состојба ќе биде повторно проценета за да се утврдат понатамошните чекори на неговото закрепнување“ велат од Шкендија.
