Лука Дончиќ го продолжува фантастичниот почеток на НБА сезоната и оствари учинок каков што лигата не видела повеќе од шест децении. Словенечкиот кошаркар постигна 393 поени на првите десет натпревари во сезоната 2026/27, што е трет најдобар резултат во историјата на НБА-лигата. Повеќе поени во првите десет настапи во една сезона постигнал само легендарниот Вилт Чемберлен.
До ова достигнување Дончиќ стигна по победата на Лос Анџелес Лејкерс над Атланта Хокс со 124:114. Тој беше најефикасен на натпреварот со 32 поени, на кои додаде и 10 асистенции, осум скока, пет украдени топки и две блокади. Од поле шутираше 11/22, а ги реализираше и сите седум слободни фрлања.
Дончиќ по десет одиграни натпревари има просек од 39,3 поени, а дури шест пати оваа сезона постигнал најмалку 40 поени. Двапати ја надмина и границата од 50 поени, вклучувајќи го и неодамнешниот дуел против Портланд, на кој постигна 53 поени. Во просек бележи и по 7,8 скока и 7,9 асистенции.
Во историјата на НБА-лигата само Вилт Чемберлен имал подобар почеток на сезоната. Легендарниот центар постигнал 496 поени на првите десет натпревари во сезоната 1961/62, додека во следната сезона, во истиот период, неверојатни 529 поени.
Токму во сезоната 1961/62 Чемберлен поставил просек од 50,4 поени по натпревар, што и денес претставува недостижен рекорд во НБА-лигата. Една година подоцна сезоната ја завршил со просек од 44,8 поени.
Дончиќ против Атланта го одигра првиот натпревар откако поради проблеми со грбот го пропушти претходниот дуел против Детроит. Неговото враќање им помогна на Лејкерс да стигнат до шестата последователна победа и биланс од десет победи и два порази.
На почетокот на неделата Дончиќ беше прогласен и за најдобар играч на Западната конференција за претходната седмица. Во трите победи на Лејкерс во тој период имаше просек од 45 поени, седум скока и 8,3 асистенции.
Атланта Хокс – Лос Анџелес Лејкерс 114:124
Шарлот Хорнетс – Кливленд Кавалирс 124:112
Детроит Пистонс – Вашингтон Визардс 122:111
Торонто Репторс – Мемфис Гризлис 102:118
Далас Маверикс – Индијана Пејсерс 125:122
Хјустон Рокетс – Денвер Нагетс 110:100
Феникс Санс – Сан Антонио Спарс 96:122
Голден Стејт Вориорс – Њу Орлеанс Пеликанс 138:87
