Македонската женска ракометна репрезентација по првото полувреме против Турција во рамките на 2. коло на Европското првенство има негатива од три гола 12-15. Сара Ристовска е прв стрелец, има шест гола, половина од вкупните за Македонија.
И на оваа средба техничките грешки беа главна одлика на нашата репрезентација.
Мицевска ја запиша првата одбрана, на другата страна Сара Ристовска реализираше од контранапад за 1-0. Во првите десет минути од мечот Македонија постигна само два гола, иако и противникот грешеше, сепак подобро се снајде и успеа да поведе со 4-7 на средината на првото полувреме. Турција при новите 5-8 имаше две шанси да го зголеми водството, на голема среќа не ги искористи ниту двете. Сепак тоа го стори нешто подоцна, на стартот на 20-та минута противникот поведе со 6-11.
Грчевски повика тајм-аут, а Турција остана со играч помалку. Македонија со трите гола на Ристовска дојде на 9-11. По серијата на грешки на двете страни, противникот подобро се снајде и дојде на нови плус четири 9-13.
Ристовска повторно го прекина налетот на турските ракометарки 10-13. Иако Турција влезе во криза, „црвено-жолтите“ повторно не се снајдоа за да влезат во резултатски егал, па следеше нова негатива од четири гола (10-14).
На полувреме резултатот е 12-15, останува да се надеваме дека нашите девојки ќе успеат да одиграат многу подобро, со вакво издание вториот пораз ќе биде неизбежен.
