На едно коло пред крајот на првиот дел од сезоната во Кадетската лига, фудбалерите на Работнички имаат 38 бода, три повеќе во однос на директниот конкурент Вардар.
Зад водечкиот двоец е третиот градски ривал Македонија ЃП која по 14 одиграни рунди има 34 бода,
Меѓу петте најдобри се уште Пелистер кој е на четвртата позиција со 31 бод, два повеќе од АП Брера.
Лидерот, Работнички го совлада Тетекс со 6:0, а стрелци на головите беа Омер Идризи, Леон Ангелески, Јован Миленковски, Давид Лиотоски додека два пати прецизен беше Матеј Ѓерасов.
Вардар ја декласираше Струга Трим Лум со 10:0, троен стрелец беше Коста Бошковски, два гола беа дело на Стефан Јордановски, а противничкиот голман го совладаа уште Петар Блажевски, Андреј Цветановски, Влатко Кркачоски, Лука Георгиоски и Админ Абдула.
Еден погодок беше доволен Македонија ЃП да ги освои трите бода. Натпреварот беше решен во 63. минута кога меѓу стрелците се запиша Лука Даниловски.
Пелистер исто така со 1:0 славеше во дуелот против Скопје додека АП Брера во соочувањето со Арсими триумфираше со 4:0.
Шкендија во Тетово забележа победа од 1:0 во мечот против Брегалница, Њу Старс како гостин го совлада Шкупи со 2:0, а единствено немаше победник на дуелот Тиквеш – Башкими каде двата тима постигнаа по три гола.
Првиот дел од сезоната завршува овој викенд. Работнички е гостин на Скопје, Вардар исто така му гостува на Арсини, Бреганица во Штип е домаќин на Македонија ЃП.
Струга ТЛ го пречекува Пелистер, а АП Брера гостува во Куманово каде ќе се соочи со Башкими.
