Веќе неколку дена тимот на Манчестер Јунајтед ги одработува летните подготовки и тоа со новиот тренер, Ерик Тен Хаг. Холанѓанецот летово пристигна на Олд Трафорд, презема тим во многу специфична ситуација, и го чека многу работа. Тој заедно со тимот викендов замина на турнеја во Азија, каде што ќе бидат одиграни неколку пријателски средби, како на пример онаа во вторник против Ливерпул во Тајланд.
„Секако дека сакам да внесам повеќе енергија во мојот тим, но морам да кажам дека играчите се снаоѓаат навистина добро. Тие се многу фокусирани и самите ја донесоа таа енергија. Можете да видите дека тие уживаат да играат фудбал, да го прават тоа заедно и да работат како тим. Морам да научам повеќе за тимот, за личностите во него, и како играчи и како поединци. Мислам дека ова е најголемата предност на претсезонските турнеи. Имате две недели да бидете сите заедно, да работите заедно и да се запознаете многу подобро. Сигурен сум дека сакам да знам повеќе за нив, како што тие сакаат да знаат повеќе за мене и моите асистенти. – вели тренерот на Јунајтед па додава.
„Сакам да играм проактивен фудбал и со и без топка. Ќе се обидеме да го направиме тоа, тоа е нашата намера. Ова е идеја и на тренерите кои се во тимот. Мораме да покажеме храброст, да ја сакаме топката, која ќе ни даде можности. Сепак, ова важи и кога го немаме, мораме да притискаме и да работиме тимски“, изјави Холанѓанецот пред заминувањето на „црвените ѓаволи“ во Тајланд.
