Американскиот бек Ноа Фарахан, кој летово пристигна како едно од главните засилувања во редовите на македонскиот шампион МЗТ Скопје Аеродром, веќе напорно тренира со екипата и ги сподели своите први импресии од клубот, градот и очекувањата за претстојната сезона.
Од него се очекува да биде еден од главните лидери и мотори на „сино-белиот“ тим во предизвиците што следат на три фронта – домашната Суперлига, АБА2 лигата и настапите во ФИБА Еврокупот. Тој не го крие задоволството од топлото добредојде во Скопје и Аеродром.
„Скопје е навистина убав град, особено Аеродром каде што минувам најголем дел од времето, а луѓето се прекрасни и ме пречекаа со раширени раце. Стручниот штаб, соиграчите, сите во клубот одлично се прилагодуваат и навистина се чувствувам многу удобно, буквално како дома. Ваквата позитивна атмосфера и поддршка се огромна мотивација за мене да дадам сѐ од себе на теренот и да ги израдувам навивачите“, истакна Фарахан.
Зад „сино-белите“ се првите десет дена од подготвителниот период, а Американецот има исклучително позитивни впечатоци за квалитетот и работната етика на екипата:
„Имаме одлична група момци. Сите покажуваат неверојатна борбеност и енергија уште од првиот тренинг. Играме брза кошарка, топката одлично се движи по теренот и секој ден сѐ подобро се воигруваме. Уверен сум дека доколку останеме сплотени и се држиме заедно, пред нас е исклучително успешна сезона“, дополни Американецот
Пред МЗТ Скопје е сезона полна со предизвици и згуснат распоред со по три натпревари неделно, особено со настапот во европските купови, што претставува дополнителен мотив за 25-годишниот бек:
„Настапот во Европа е огромен предизвик. Тоа е натпреварување од највисок ранг каде што секој тим влегува со максимална борба на секој меч. Нема простор за опуштање, мора да бидеме максимално фокусирани и тактички прецизни. Но, токму за вакви предизвици живеат врвните играчи — да го покажеме својот вистински карактер и да направиме големи работи“, оптимист е Ноа.
На директното прашање дали е подготвен да ја преземе одговорноста и улогата на лидер на овој тим на МЗТ Скопје, Фарахан кратко и самоуверено порача:
„Да, апсолутно сум подготвен!“.
Првиот официјален предизвик е закажан за 26 септември, кога МЗТ Скопје игра Суперкупот против Куманово.
