Дијамантската атлетска лига го објави календарот за сезоната 2027, во која најдобрите светски атлетичари ќе се натпреваруваат на 15 митинзи во четири континенти, во борба за пласман на големото финале во Цирих.
Осумнаесеттата сезона на елитното атлетско натпреварување ќе започне на 7 мај во Доха, Катар, а ќе заврши со дводневното финале во Цирих, Швајцарија, на 25 и 26 август.
По отворањето во Доха, атлетичарите ќе се преселат во Кина, каде што ќе се одржат митинзите во Шангај/Кечијао на 15 мај и во Сјамен на 22 мај. Следуваат Рим на 27 мај и Рабат на 30 мај, по што серијата продолжува во Европа со натпреварите во Осло на 3 јуни, Стокхолм на 6 јуни и Париз на 25 јуни.
Американскиот дел од сезоната ќе се одржи во Јуџин на 3 јули, а потоа следуваат Монако на 9 јули, Лозана на 13 јули и Лондон на 17 јули.
Во август, последните можности за освојување бодови пред финалето ќе бидат митинзите во Шлезија на 15 август и во Брисел на 20 август. Најдобрите во своите дисциплини потоа ќе се борат за титулите во Цирих на 25 и 26 август.
На митинзите од серијата, атлетичарите ќе собираат бодови во 32 дисциплини, а најуспешните ќе обезбедат место на финалето, каде што ќе бидат прогласени шампионите на Дијамантската лига.
Сезоната во 2027 година ќе има и дополнително значење, бидејќи ќе претставува важен тест на формата пред Светското првенство во атлетика, кое во септември ќе се одржи во Пекинг.
Дијамантската лига е едно од најпрестижните еднодневни натпреварувања во атлетиката и секоја година ги собира најголемите светски ѕвезди во трчање, скокови и фрлачки дисциплини.
