Струга ТЛ и Пелистер денеска од 15 часот покрај езерото во меч од 26.коло во нашата елитна фудбалска лига ќе ги одмерат силите. Ова е меч во кој освен за престиж се чини дека ништо друго не е важно. Посебно за шампионот, тимот на Струга ТЛ кој одамна се откажа од битиката за титулата па и од битката за висок пласман и битката за излез во Европа.
Па така стружани сега единствен начин е да ја спасат сезоната е да го освојат Купот на Македонија, а патот до финалето води преку Шкендија, а првиот меч со тетовци во 1/2 финалето ќе се игра во среда.
Токму затоа овој денешен дуел со Пелистер ќе биде само загревање за дуелот со тетовци.
Марјан Радески напаѓачот на Струга ТЛ во пресрет на денешниот меч истакнува:
„Верувам дека вистинската сезона и најважните натпревари за нас почнуваат од денеска и до крајот на сезоната, каде што не очекуваат многу важни натпревари, преку кои ќе се обидеме да дојдеме до пехарот во Купот. Го респектираме секој противник, како што дефинитивно го респектираме и Пелистер. Нормално, очекувањата за овој меч се само 3 бода. Истото ќе биде многу важно не само за пласманот, туку и психички пред натпреварот од Купот против Шкендија. Атмосферата во тимот е одлична, среќни сме што немаме повредени играчи, па сите ќе бидеме подготвени да го дадеме максимумот на денешниот натпревар и на крајот да излеземе победници. – заврши Радески, кој на натпреварите од Првата лига има постигнато 83 гола.
Останатите натпревари од 26.коло се играат утре од 15 часот.
