Утре во Штип, во меч од 12.коло во ПМФЛ, силите ќе ги одмерат Брегалница и А. Пандев, останатите мечеви од ова коло се играат во среда.
Тоа се две екипи кои се најголемите разочаривања во досегашниот дел од сезоната. Пред стартот на сезоната и двете екипи се посочуваа дека имаат квалитет и амбиции за пласман најмалку меѓу ТОП-5 екипи во ПМФЛ, но по 11. коло тие се долу на табелата, посебно „пандевци“.
Токму затоа велиме дека ова ќе биде и меч кој не смее ни Брегалница ни А.Пандев да го загубат, во спротивно сигурно е дека ќе има потреси.
Интересно, ова ќе биде и тренерски дуел на Илчо Ѓорѓиоски и Александар Васоски, прва нивна меѓусебна пресметка во ПМФЛ. И двајцата важат за шампионски тренери, Илчо го освои пехарот со Македонија ЃП во 2008/09 и со Вардар во 2011/12, и Васоски со Вардар во 2019/20. Но утре за првпат ќе се надмудруваат како тренери еден против друг.
Сепак и на двајцата оваа есен на клупите на своите тимови не им оди, никако.
Илчо веќе пет кола не знае за победа во ПМФЛ со Брегалница и тоа од 4 септември. Од тогаш минаа пет кола и има нула победи, две ремија и три порази. Вкупно Илчо оваа есен во изминатите 11 кола на 10 меча има само 3 победи, три ремија и 4 порази и се наоѓа на седмата позиција на табелата.
Васоски пак откако се врати на клупата на “пандевци“ има нула победи, едно реми и три порази во тие четири кола откако повторно е стратег на тимот од Струмица.
Јасно е, утрешниот меч ќе биде екстра значаен и за двете екипи, но ќе биде уште позначаен и за Илчо и за Васоски.
Ова ќе биде битка која не смее да се загуби.
