Алкалоид продолжи во победнички ритам, ја потврди својата доминација во пресметките со Прилеп. Овој пат избраниците на Кирил Лазаров на домашен терен славеа со 37-22 во рамките на осмото коло во Супер-лигата и се зацврстија на второто место во групата А.
Гостите до средината на првото полувреме беа рамноправен противник, отворија со 1-3, водеа со 4-5. На другата страна домашниот состав со серија од 3-0 поведе со 7-5 и полека го наметна својот ритам. На одморот замина со водство од 19-12, благодарение на серијата од 6-1.
Во второто полувреме сликата целосно се промени, Прилеп во осум минути постигна два гола, додека на другата страна Алкалоид влезе фуриозно, поведе со 25-14 и широко го отвори патот кон седмата победа оваа сезона. За прилепчани ова беше петти пораз, имаат реми и две победи.
Петковски со шест гола беше прв стрелец, по четири имаа Серафимов, Илиевски и Иваноски. На другата страна Ѓоргиевски со девет гола беше најдобар на теренот.